POU PRISHEELA MOTTEE
Kreol : fodre nou res andan kad…
Konsernan lartik Mamzel Prisheela Mottee pibliye dan forum Le Mauricien le 23 Zilyet 2008, sa fer plezir ki ou aksepte ki servi langaz kreol pou explik bann zanfan fer zot konpran pli byen ek kouma ou dir dan ou lartik, " Kreol li dan nou kiltir li enn de bann metod pli sinp pou anseign zanfan pou ki zot kapav asimil pli boukou ek vit ".
" … asimil pli boukou ek vit. " Ala kifer nou bizin li pou ki ena plis progre dan nou sistem ledikasyon !
Me mo trouv ou lexanp ki ou finn done pou kontredir lanseignman dan langaz kreol ziska Form 3 andeor kad.
Premyerman, bann fraz kouma "the teacher is battering the child" ek "ze par a la boutik" ki ou dir " boukou dimounn inn bizin lir ou tand sa ban fraz-la ", mo pa kone kot ou finn tann sa souvan, me dan mo lantouraz, zame mo finn tann zot.
Pou plis presizyon, mo definir mo rezyon "Port-Louis : Terre-Rouge", kot ni mwa, ni mazorite bann abitan, pa koz angle ek franse lakaz. Kitfwa ou pe fer referans avek zelev lekol primer ki pe dekouver de nouvo langaz. Si mazorite bann adilt ti pe koz koumsa, alor ki bann sant-dapel pe fer dan Moris, ek kouma lindistri tourist pe prospere ? Seki vedir, mem si ena li, li byen minim ek san okenn linportans.
Ek dezyeman lanseignman dan langaz kreol ziska Form 3 pena nanye avwar avek prononsyasyon bann mo angle ek franse. Anseign bann zelev dan langaz kreol ziska Form 3 pa vedir aret lir angle ek franse. Si ou finn reazir lor sa lide-la, alor ou finn mal konpran. Si pa lir angle ek franse dan klas angle ek franse, alor pena klas ! Me apre ki lir bann konpreansyon ek explik bann pwin dan konpozisyon, bizin pa atann zelev-la lev so lame pou explik li an kreol. Souvan bann zelev lekol primer santi zot malalez pou ki zot lev zot lame dan enn klas 40 zelev ek avwe ki zot pa finn konpran, per ki profeser-la imilye zot ek intimide par langaz etranzer.
Zot prefer gagn zot explikasyon dan leson prive (si zot ena mwayen).
Li parey kouma enn dokter, servis ki ou gagne dan lopital avek li ek dan so konsiltasyon prive, li enn lemond diferans. Enn pratik ki zot tou kone, " pa mwa ki finn invant sa ".
Si bann etranze prefer Moris pou inplant zot bann sant-dapel li parski nou ena enn bon aksan mem si nou pa koz zot langaz toulezour. Kontrerman avek l'Ind, kot preske tou klas fer an angle ek bann Indien koz angle boukou fwa plis ki bann Morisyen me mem sa, zot laksan mediok. Laplipar bann Indien kan koz angle, zot sonn vilin. Zot langaz maternel fer defo dan zot laksan.
Enn ti lexanp, "The" = "Dee"".
Angle finn kit l'Ind, me l'Ind obsede avek Angle…
Kreol li zoli parski li batar. Akoz li batar, li flexib. Ek parski li flexib, li ena enn souples dan prononsyasyon seki fer nou zwir enn bon aksan pou koz ninport ki langaz etranze kan bizin ek kouma bizin.
Tahir Hussen Pirbhay
Pibliyer le mauricien 31 zilyet 2008
